54歲「中佬」張兆輝Keep fit之道 開工不食飯

近年中港兩地均吃得開的張兆輝，與無線繼續簽部頭合約，一年拍一劇keep住曝光率；無論是年前超過40億點擊率的大熱內地劇集《北上廣不相信眼淚》及月初播畢的商戰劇《雞毛飛上天》，抑或TVB時裝喜劇《全職沒女》，皆是飾演霸氣總裁，其鑽石級王老五超熟男形象，觀眾似乎十分受落。

做生意賺錢睇長遠

本身經營數間美容院生意的張兆輝，卻謙說扮演集團總裁時要向大老細級朋友借鏡。

我想盡量跟貼啲，便向一些做大生意的朋友學談吐、思考方式。當中都有得着，學懂工作不要只識一味死衝，最重要是有思考、吸收、沉澱的空間，讓生意可以有更多突破，帶動潮流、走前行家幾步；演戲亦可每次都有新的變化、給予角色生命。

▲ 與妻子合力將美容院生意辦得有聲有色，曾邀請邵美琪當代言人。（微博圖片）

張老闆笑說如果有得揀，一定選擇演戲。

做生意要理的瓣數多好多，若做得不出色會好快頂唔順；做得好，就同行如敵國，有好多競爭者、謠言中傷。要經常處於打仗狀態，保護自己、動腦筋去應付敵人，因不知道別人幾時出刀；又要為自己生意不斷想點子、提供多元化服務，吸引消費者認同。演戲則只需專注做好自己角色，相對較單方面、易handle。

▲ 早已上岸的張兆輝，最愛到水底世界潛水減壓，並指做生意要不斷求進步：「與客做朋友，針對他們的需要而提供服務。」（陳偉能攝影）

多年歷練，張兆輝悟出做生意宗旨的四字真言︰以誠待人。

錢是永遠搵唔晒，要過到人、也過到自己的關，攞個心出來做，最好我與客戶都賺，那就雙方都開心。

做生意不是做一次、要看長遠，做美容生意要提供合理服務，如別人每次收100元、賺80元，我則是成本價80元、只賺20元；別人係今日賺到80元，但只賺得一次，我卻是收完又收、不停賺。

老婆年年18歲

▲ 張兆輝與郭碧妍於1997年結婚，多年來一直非常恩愛。（微博圖片）

【延伸閱讀】好爸爸張兆輝「愛回家」 陪伴子女成長回憶千金難買

張兆輝今年54歲，防腐有術與開美容院近水樓台常做facial有關？

我的keep fit之道？開工時不會食飯、肥膩食物，多食菜、白肉、魚；趁拍劇後有時間，就去多做運動如踢足球。

一定要多郁動，行路、踩單車都好，或者陪女兒在家樓下散步、在會所做gym，不要常屈在家。最減壓就是潛水，因做生意朋友認為潛水最能令人放鬆，可讓腦筋寧靜、停下來，才會有進步。

▲ 張兆輝經常為愛妻帶來小驚喜，送花放閃，羨煞旁人。（微博圖片）

話說《全職沒女》前名是《師奶大翻身》，張兆輝趁機會大讚家中的「張師奶」。

我以前很少讚老婆，因為她本身就是靚唔使讚！現在我成日同她講︰「在我心目中，你永遠都是18歲，大家一起變老吧！」

愛你如初見，原來張兆輝都可以很浪漫。

化粧︰Frances Ho @ jessica chan makeup-workshop
服裝︰Club Monaco
場地︰香港九龍東皇冠假日酒店

【其他熱話】舊鞋救命 發動港人全城捐鞋

【其他熱話】打工仔月入2.9萬 妄想買層樓

【其他熱話】郵政署頂薪2.5萬元請郵差 要孭35磅的郵袋